Kryetari i Komunës së Vitisë, Sokol Haliti, ka njoftuar se të mërkurën (11 qershor) e ka shpallur ditë zie në këtë komunë.
Haliti ka thënë se këtë vendim e ka marrë në shenjë nderimi të ndarjes nga jeta të tre të rinjve vitias brenda tre ditësh.
“Me pikëllim të thellë dhe zemër të rënduar ju njoftoj se këto ditë, komuna jonë është tronditur nga tri humbje të mëdha. Brenda vetëm tre ditësh, kemi humbur tre të rinj vitias – bij e bija të kësaj toke, që u ndanë nga jeta në mënyrë të parakohshme dhe tragjike.Kjo dhimbje është e papërshkrueshme dhe ka prekur thellë secilin prej nesh. Në nderim të jetës së tyre dhe për të shprehur solidaritetin e institucioneve dhe të gjithë qytetarëve me familjet që po përballen me këtë dhembje të madhe, shpall të mërkurën, 11.06.2025 DITË ZIE në Komunën e Vitisë”, ka shkruar ai në Facebook.
Haliti ka bërë të ditur se gjatë kësaj dite flamujt në të gjitha institucionet komunale do të ulen në gjysmështizë, aktivitetet kulturore, sportive dhe festive do të pezullohen, si dhe institucionet dhe qytetarët do të nderojnë kujtimin e të rinjve me heshtje dhe respekt të thellë.
“I ftoj të gjithë qytetarët e Vitisë të bashkohen në këtë ditë zie, për të nderuar kujtimin e të ndjerëve dhe për të qëndruar pranë familjeve të tyre, duke ndarë dhembjen me solidaritet dhe dashuri njerëzore. Ngushëllimet më të sinqerta familjeve të prekura. Zoti ua lehtësoftë dhimbjen dhe i pastë të ndjerët në mëshirën e Tij”, ka përfunduar postimin e tij Haliti.
Familjarët dalin me njoftim për vdekjen e vajzës nga Kosova në sulmin me armë në Austri
