Të miturit me inicialet B.M., i është caktuar masa e paraburgimit prej 30-ditësh, pasi që i njëjti dyshohet se ka planifikuar vrasjen e nxënëse në klasën e tij.
Masa e paraburgimit është caktuar nga Prokuroria Speciale e Kosovës.
Lajmin e ka konfirmuar për teve1.info zëdhënësja e kësaj gjykate, Mirlinda Gashi.
“Gjyqtarja e procedurës paraprake ka aprovuar si të bazuar kërkesën e Prokurorisë Speciale të Republikës së Kosovës, për caktimin e masës së paraburgimit ndaj të miturit B.M. dhe të njëjtit i ka caktuar masën e paraburgimit në kohëzgjatje prej tridhjetë (30) ditësh”, ka thënë Gashi.
Ndërkohë, Prokuroria Speciale e Kosovës njofton se i mituri është ndaluar për shkak se ka bërë plane për një sulm të gjere ndaj disa nxënësve të një shkolle në Pejë.
“Prokuroria Speciale e Republikës së Kosovës (PSRK), njofton opinionin publik se është ndaluar i pandehuri me inicialet B.M. për shkak se në periudhë kohore disamujore ka bërë plane dhe është përgatitur për ndërmarrjen e një sulmi të gjerë ndaj disa nxënësve të një shkolle në Pejë”, thuhet në komunikatë.
I dyshuari është arrestuar nga Policia e Kosovës të shtunën, në Pejë.
“Është arrestuar i dyshuari mashkull kosovar nën dyshimin se i njëjti paraqet kërcënim. Me vendim të prokurorit, i dyshuari është dërguar në mbajtje”, thuhet në raportin e Policisë së Kosovës, ku rasti është iniciuar “Përgatitje e veprave penale terroriste ose veprave penale kundër rendit kushtetues dhe sigurisë së Republikës së Kosovës”.
