Policia e Kosovës e ka arrestuar një ish zyrtar të gjendjes civile në Ferizaj, mbi dyshimin e keqpërdorimit të pozitës apo autoritetit zyrtar, raporton teve1.info
Sipas komunikatës për medie të Policisë, lidhur me rastin dyshohet se i dyshuari mashkull kosovar ka keqpërdorur detyrën zyrtare duke regjistruar një shtetas të huaj (turk) në sistemin elektronik të gjendjes civile në komunën e Ferizajt, teksa i njëjti nuk i kishte plotësuar kriteret e fitimit të shtetësisë.
“Si rrjedhojë e këtyre veprimeve të njëjtit i ishte mundësuar që të pajiset me letërnjoftim të Republikës së Kosovës dhe pastaj edhe me patentë shofer. Me datë 23.04.2024, është siguruar prezenca e të dyshuarit të lartcekur për intervistë në prezencë të avokatit mbrojtës, ku pas intervistës me aktvendim të prokurorit, i njëjti është ndaluar për 48 orë. Ndërsa personi i dyshuar mashkull turk që dyshohet se ka konsumuar veprën penale “Legalizimi i përmbajtjes së rreme” tani është i ekstraduar në Turqi”, thuhet në komunikatë.
