Vjen nga Gjilani i Kosovës.
Por, gjyqin e parë, Liridon Masurica, e pati me 12 maj në Shtetet e Bashkuara të Amrikës.
Nga Kosova për në SHBA, 33 vjeçari u ekstradua me 9 maj.
Kjo meqë ndaj tij, po rëndojnë akuzat për mashtrim dhe vjedhje të identitetit të qytetarëve.
I njohur me nofkën “blackdb”, gjilanasi ishte administratori kryesor i faqes me të njëjtin emër, në tregun kriminal online.
E nëse provohet fajësia, Liridon Masuricën e pret një dënim prej 55 vjetësh burgim.
“Masurica, shtetas dhe banues i Kosovës, është dërguar në paraburgim nga autoritetet në Kosovë më 12 dhjetor 2024 dhe është ekstraduar më 9 maj në Shtetet e Bashkuara të Amerikës, në bazë të marrëveshjes së ekstradimit ndërmjet Shteteve të Bashkuara dhe Republikës së Kosovës”, thuhet nga Zyra e Prokurorit të distrikti i mesëm i Floridës
Por, çfarë dyshohet se bëri gjilanasi, që e ngriti në këmbë edhe FBI-në amerikane?
“BlackDB.cc ofroi në mënyrë të paligjshme për shitje kredencialet e kompromentuara të llogarisë dhe serverit, informacionin e kartës së kreditit dhe informacione të tjera personale të identifikueshme të individëve të vendosur kryesisht në Shtetet e Bashkuara, duke përfshirë ata të vendosur brenda Qarkut të Mesëm të Floridës” , thuhet tutje.
Kësisoj, sipas Prokurorisë, zhvilloheshin një gamë e gjerë aktivitetesh të paligjshme, duke përfshirë mashtrimin tatimor, mashtrimin me kartat e kreditit dhe vjedhjen e identitetit.
Sipas Zyrës së Prokurorit nga Distrikti i Mesëm i Floridës, për arrestimin e Masuricës ndihmë dha Prokuroria Speciale e Kosovës, si dhe Drejtoria e Hetimit të Krimeve Kibernetike e Policisë së Kosovës.
Këta të fundit, arrestuan Liridon Masuricën me 12 dhjetor të vitit të kaluar.
Ndërkohë, ministrja në detyrë e drejtësisë në Kosovë, Albulena Haxhiu, ka shkruar se kjo është dëshmi që krimi nuk gjen strehim në Kosovë.
