Prokuroria Themelore në Gjakovë ka bërë të ditur se ka nisur hetimet ndaj pesë personave të dyshuar për organizim të bixhozit të paligjshëm dhe ka kërkuar caktimin e masës së paraburgimit prej 30 ditësh për ta.
Sipas njoftimit, ndaj të dyshuarve me inicialet E.B., A.B., N.H., J.M. dhe Z.P. është paraqitur kërkesë në Gjykatën Themelore në Gjakovë.
Prokuroria njofton se të dyshuarit dyshohet se nga një kohë e pacaktuar deri më 12 mars 2026, rreth orës 21:00, në një lokal afarist në Malishevë kanë organizuar dhe zhvilluar lojëra të fatit në kundërshtim me ligjin.
Sipas hetimeve, i dyshuari E.B., në cilësinë e pronarit të lojërave, bashkë me të dyshuarit e tjerë, dyshohet se kanë përdorur lokalin për organizimin e këtyre lojërave me qëllim përfitimi të kundërligjshëm financiar.
Gjatë kontrollit të kryer nga zyrtarët policorë, të dyshuarit kanë tentuar të arratisen duke u hedhur nga një dritare e objektit, por janë ndaluar nga policia.
Gjatë bastisjes në lokal janë gjetur pesë aparate të lojërave të fatit në funksion. Në disa prej tyre janë gjetur edhe para të gatshme, ndërsa në çantën e të dyshuarit E.B. janë gjetur rreth 2 mijë euro, të cilat janë sekuestruar nga policia.
Sipas Prokurorisë, me këto veprime të dyshuarit dyshohet se kanë kryer veprën penale “Organizimi i skemave piramidale dhe bixhozit të paligjshëm”.
