E një i mitur nga komuna e Pejës, po dyshohet se për disa muaj kishte bërë plane rreth një sulmi terrorist ndaj shokëve të shkollës ku po mësonte. Sipas Prokurorisë Speciale, i njëjti ka kryer veprën penale “Përgatitje e veprave terroriste ose veprave penale kundër rendit kushtetues dhe sigurisë së Republikës së Kosovës”. Nga ana tjetër, njohësit e drejtësisë tregojnë se dënimi maksimal për këtë vepër mund të shkoj deri në pesë vite.
Për disa muaj, i mituri B.M dyshohet se kishte planifikuar një sulm terrorist ndaj disa nxënësve të klasës tij.
16-vjeçari nga komuna e Pejës, sipas Prokurorisë Speciale të Kosovës, ishte përgatitur për të ndërmarrë veprimet për një sulm në fund të këtij muaji.
“Me këto veprime i pandehuri B.M. kishte për të kryer veprën penale ‘’Përgatitja e veprave terroriste ose veprave penale kundër rendit kushtetues dhe sigurisë së Republikës së Kosovës’’, nga neni 138 lidhur me nenin 129 të Kodit nr. 06/L-074 Penal të Republikës së Kosovës”, thuhet në njoftimin e Prokurorisë Speciale.
Mirëpo nga këta të fundit, nuk ka detaje të reja, për shkak të fazës së hetimeve.
“Në këtë fazë të hetimeve Prokuroria nuk mund të jep asnjë informatë më shumë, përpos asaj të cilën e kemi ndarë me ju gjatë ditës së djeshme”, ka deklaruar zëdhënësi i Prokurorisë Speciale, Ekrem Lutfiu.
Nga ana tjetër, njohësit e ligjit tregojnë për dënimin që mund të shqiptohet ndaj të dyshuarit.
Sipas Valdet Hoxhës, për këtë vepër dënimi maksimal për të mitur shkon deri në pesë vjet.
E sociologu Genc Xërxa tregon arsyet që mund të dërgojnë deri tek një akt i tillë.
Ndaj të miturit B.M, Gjykata ka caktuar masën e paraburgimit prej 30 ditësh.
