Po i kryejnë rregullisht ritualet e tyre fetare.
Por, në këtë xhami të fshatit Ramnishtë të Vitisë, po dyshohet se po keqpërdoret feja për qëllime tjera.
Të paktën kështu thotë, kryetari i Këshillit të Bashkësisë Islame në Viti, Husamedin Hoxha.
Ai thotë se këtë dhe xhaminë në fshatin Skifteraj nuk i kanë nën menaxhim, andaj ardhja e disa personave të dyshimtë nga zona tjera të vendit ka bërë që t’i lajmërojnë edhe institucionet e sigurisë.
Por nga Komuna e Vitisë, fajin për këtë ia hedhin KBI-së në këtë qytet.
Nënkryetari, Hasan Aliu vlerëson se nga ky Këshill duhet të ketë fakte dhe argument për një gjë të tillë, e më pas të veprohet në këtë drejtim.
E nga Policia e Kosovës konfirmojnë se janë në dijeni për rastin, andaj janë edhe në fazën e mbledhjes së provave.
Zëdhënësi, Ismet Hashani thotë se nëse provohet që ka elemente të veprës penale, do të veprojnë menjëherë.
Televizioni ka qëndruar gjatë ditës në këtë fshat, për të marrë edhe një qëndrim nga imami i kësaj xhamie lidhur me pretendimet e Këshillit lokal.
Por as ai, as xhemati i këtushëm nuk kanë pranuar të flasin para kamerës.
