Komisioni Qeveritar për Persona të Zhdukur ka bërë të ditur se sot nga ora 10:00 do të zhvillohen inspektime në fshatin Kozhle, afër Novi Pazarit, për të vlerësuar një lokacion ku dyshohet se mund të ekzistojë një varr masiv.
Në njoftim është bërë e ditur se ky proces është rezultat i kërkesave të vazhdueshme në kuadër të dialogut dhe takimeve ndërmjet delegacioneve, të cilat kanë për qëllim zbardhjen e fatit të personave të zhdukur gjatë luftës në Kosovë.
Gjithashtu është thënë se lokacioni në Kozhle ishte planifikuar të trajtohej edhe vitin e kaluar, por gërmimet ishin ndërprerë pas disa ditësh përgatitje.
Komisioni thekson se gërmimet në terren duhet të shoqërohen edhe me të dhënat nga arkivat e institucioneve përkatëse të Serbisë, në mënyrë që të përcaktohet me saktësi vendndodhja e varrezës masive dhe të sigurohen prova të domosdoshme për hetimin e plotë të rastit.
Vlerësimet në Kozhle do të ndiqen edhe nga përfaqësues të Delegacionit të Republikës së Kosovës, përfshirë anëtarë të Komisionit Qeveritar për Persona të Zhdukur dhe ekspertë të Institutit të Mjekësisë Ligjore.
“Dhimbja e familjeve që prej më shumë se dy dekadash presin një përgjigje për fatin e më të dashurve të tyre është plagë e hapur e shoqërisë sonë. Çdo hap drejt zbardhjes së së vërtetës është hap drejt drejtësisë, drejt paqes së munguar dhe dinjitetit njerëzor. Komisioni Qeveritar për Persona të Zhdukur do të vazhdojë të punojë me përkushtim dhe këmbëngulje, deri në zbardhjen e plotë të fatit të secilit person të zhdukur”, thuhet tutje në njoftim. /teve1.info/
