Dy vjet pas dorëheqjes së serbëve nga institucionet e Kosovës pozitat e hapura kanë nisur të plotësohen. Në Policinë e Kosovës janë 64 pjesëtarë të komunitetit serb që po i shërbejnë vendit. Nga janari ky numër do të rritet.
Në mënyrë të organizuar ishin mbledhur dhe zhveshën uniformat e tyre.
Kështu rreth 500 pjesëtarë të komunitetit serb në komunat veriore dhanë dorëheqje nga Policia e Kosovës më 5 nëntor të vitit 2022.
Dorëheqjet e tyre pasuan pas vendimit të Listës Serbe për largim nga institucionet qendrore të Kosovës.
Por, dy vite pas këto pozita kanë nisur të plotësohen.
Zv.drejtori rajonal i Policisë në Mitrovicën Veriore, Veton Elshani tregon numrin e policëve nga nacionaliteti serb.
“Unë tash në veri të vendit i kam mbi 300 policë aktiv, 68 nga ta janë kosovar të përkatësisë etnike serbe. Ne konsiderojmë që edhe një numër i mjaftueshëm i tyre do të vijë këtu kah fundi i janarit fillimi i shkurtit në këtë vend kështu që numri do të jetë i plotësuar mandej do të shohim se si ka mundësi të zëvendësohen edhe policët tjerë, sidoqoftë ne konsiderojmë që jemi në numër të mjaftueshëm që të ofrojmë shërbime“, ka deklaruar ai.
Po ashtu ai thotë se pritet që ky numër të rritet.
“Do ta marrim një numër mbi 120 sa unë kam informata këtu në veri të vendit kështu që është numër i mjaftueshëm, ajo çka është me rëndësi me u theksu është që më shumë kemi raste tash me 330 poicë që iu kam këtu sesa në vitin 2022 për pëeriuhdën e njëjtë kohore 9 mujore” ,ka pohuar Elshani.
Dorëheqje pati edhe nëpër komunat veriore.
Edhe, në këto institucione vlerësohet që ka numër të mjaftueshëm të punësuarve që i përkasin entitetit serb.
“Për momentin i kemi 7 zyrtarë serbë këtu të punësuar, raportet janë shumë të mira edhe me ata të punësuar çka janë nga komuniteti serb. Kështu që deri më tani raportet janë të mira, qytetarët janë shumë të interesuar që të vazhdojnë punën kështu që mirë është përgjithësisht”, ka thënë kryetari i Zveçanit, Ilir Peci.
Derisa bën apel nga komuniteti që të aplikojnë për punësim në Komunën e tij.
“Kemi pozita të cilat janë të hapura tash dhe se pritet me u shpallë vazhdimisht por në çdo konkurs pranohen disa prej tyre të cilët normal i plotësojnë kriteret… Ne do të thotë nga fillimi por edhe sot ju bëjë thirrje të gjithë atyre si në Polici, si zyrtarë nëpër komuna që të ketë aplikime edhe nga qytetarët serbë dhe të gjitha komuniteteve që janë këtu”.
Edhe pjesëtarë të gjyqësorit dhe prokurorisë në vend dhanë dorëheqje.
E për tu bërë pjesë e institucioneve nga komuniteti serb ka pasur thirrje vazhdimisht edhe nga kryeministri Albin Kurti.
Ndërkohë,gjendja në veri, konsiderohet stabile por e brishtë.
