Dy tifozë kanë humbur jetën dhe një oficer policie është në koma pas festimeve mbarëkombëtare që shpërthyen në Francë për fitoren historike të Paris Saint-Germain në Ligën e Kampionëve, njoftuan autoritetet të dielën.
Një 17-vjeçar u godit me thikë për vdekje gjatë një feste rrugore në qytetin Dax, ndërsa një tjetër tifoz humbi jetën në Paris, kur skuteri i tij u përplas nga një makinë gjatë festimeve. Autoritetet janë duke hetuar rrethanat e të dy incidenteve.
Në një tjetër ngjarje dramatike, një oficer policie në Coutances, në Francën veriperëndimore, u godit aksidentalisht nga fishekzjarrët dhe u vendos në koma artificiale për shkak të dëmtimeve të rënda në sy, njoftoi policia kombëtare, ka raportuar AP.
Megjithëse shumica e festimeve ishin paqësore, disa prej tyre degjeneruan në dhunë dhe kaos.
Deri në orën 2 të mëngjesit të së dielës, policia kishte kryer 294 arrestime, përfshirë 30 persona që kishin hyrë me forcë në një dyqan këpucësh në bulevardin Champs-Élysées. Dy makina gjithashtu u dogjën pranë stadiumit Parc des Princes.
Përballë rrezikut të trazirave, forcat e rendit kishin dislokuar 5,400 efektivë policie në zonat kyçe të Parisit dhe në periferitë përreth, përfshirë Champs-Élysées.
Në krye të këtij bulevardi, pranë Harkut të Triumfit, u përdor një top uji për të mbrojtur Place de l’Étoile nga turmat që përpiqeshin të kalonin barrikadat.
Ndërkohë, në Place de la Bastille, atmosfera ishte më festive. Tifozët u mblodhën për të kënduar, kërcyer dhe për të ndezur flakadanë, ndërsa shumë të tjerë u bashkuan me entuziazëm në kremtime.
Në një moment, një grup motoçiklistësh ndezën motorët me zë të lartë dhe u përshëndetën me brohoritje nga turma që kishte zënë vend rreth kolonës ikonike. Deri në orën 1 të mëngjesit, aty nuk kishte pranë forca policie dhe atmosfera mbeti paqësore.
