Dy personat e lënduar nga të shtënat me armë zjarri të enjten në rrugën ”Mon Balaj” në Prishtinë janë duke u cilësuar si të dyshuar, ka njoftuar Policia e Kosovës.
Në raportin 24-orësh të Policisë thuhet se ndaj tyre është caktuar masa e ndalimit 48 orë dhe se janë duke u siguruar nga zyrtarët policorë.
Po ashtu, bëhet e ditur se në vendin e ngjarjes janë gjetur dhe sekuestruar disa gëzhoja dhe një veturë me targa vendore, ndërsa në një lokacion tjetër është gjetur dhe sekuestruar edhe një veturë me targa vendore e cila ishte e goditur nga predhat.
“Raportohet se për motive të panjohura, i dyshuari mashkull kosovar, me armë zjarri, ka plagosur dy meshkuj kosovarë dhe më pas është larguar në drejtim të panjohur. Në vendin e ngjarjes janë gjetur dhe janë sekuestruar disa gëzhoja dhe një veturë me targa vendore, po ashtu në një lokacion tjetër është gjetur dhe është sekuestruar edhe një veturë me targa vendore e cila ishte e goditur nga predhat. Me urdhër të prokurorit është bastisur shtëpia e një personi, me ç’rast është gjetur dhe është konfiskuar një armë zjarri revole CZ. Të lënduarit janë duke u trajtuar në QKUK dhe të njëjtit më pas janë cilësuar si të dyshuar për të cilët prokurori ka caktuar masën e ndalimit për 48 orë dhe janë duke u siguruar nga zyrtarët policorë”, thuher në raportin e PK-së./teve1.info/
