Dy persona janë arrestuar të martën në Prizren në një operacion të zhvilluar nga Sektori Rajonal i Hetimeve te DRP- Prizren në bashkëpunim me Prokurorinë Themelore në Prizren, lidhur me veprën penale “Fajde”.
Zëdhënësi i PK-së për rajonin e Prizrenit, Shaqir Bytyqi, ka bërë të ditur se të dyshuarit kanë ushtruar presion ndaj një tjetri me qëllim të marrjes së interesit nga fajdeja.
“Të dyshuarit në këtë rast në vazhdimësi kanë ushtruar presion ndaj viktimës me qëllim të marrjes se interesit nga veprimtaria e fajdes duke e detyruar të njëjtin të veprojë në dëm të pasurisë se tij dhe si rezultat i veprimeve te kundërligjshme të dyshuarit i kanë shkaktuar dëme materiale viktimës. Gjatë operacionit policor është kontrolluar shtëpia dhe objektet tjera përcjellëse të të dyshuarve, me ç ‘rast janë sekuestruar dëshmi, dy automjete dhe dy armë, që mund të kenë lidhje me rastin”, ka thënë Bytyqi.
Ndaj të dyshuarave, pas intervistimit, me aktvendim të prokurorit nga Prokuroria Themelore në Prizren i është caktuar masa e ndalimit për 48 orë.
