Tre nga dhjetë personat e lënduar në Ferizaj nga përfshirja e zjarrit të një objekti banesor janë trajtuar në Klinikën Emergjente të QKUK-së.
Drejtori i kësaj klinike ka thënë për Tëvë 1 se dy nga ta ende janë duke u trajtuar kurse njëri pas trajtimit është liruar. Ai ka bërë me dije se gjendja e tyre është stabile.
“Diku pas orës 12 i kemi pranuar tri raste në qendrën emergjente, dy ende janë duke u trajtuar, dmth janë në observim, një pas trajtimit është liruar për në shtëpi. Gjendjen e kanë plotësisht stabile, nuk ka asgjë serioze”, ka thënë Syla.
Nëntë banues dhe një zjarrfikës kanë pësuar lëndime, si pasojë e një zjarri që ka ndodhur brenda një ndërtese kolektive, mbrëmë në Ferizaj.
Të lënduarit për shkak të plagëve të marra janë dërguar për tretman mjekësor në Qendrën Klinike Universitare të Kosovës (QKUK), ka njoftuar nga Policia e Kosovës.
