Policia e Kosovës ka ndaluar për 48 orë dy persona të dyshuar për veprën penale “Vjedhje e rëndë”, pas një rasti të ndodhur në orët e hershme të mëngjesit të sotëm në rrugën “Dervarska” në Mitrovicë të Veriut.
Sipas njoftimit të policisë, rreth orës 04:50, është raportuar se dy persona kishin hyrë me forcë në një lokal dhe kishin vjedhur një shumë të konsiderueshme parash.
Njëri prej të dyshuarve është ndaluar menjëherë nga punëtorët e një kompanie të sigurimit fizik, ndërsa tjetri kishte arritur të largohej nga vendi i ngjarjes.
Pas një pune hetimore, policia ka arritur ta lokalizojë dhe arrestojë edhe të dyshuarin e dytë. Të arrestuarit janë: K.C., 28 vjeç, dhe Z.M., 42 vjeç.
Gjatë kontrollit, tek të dyshuarit është gjetur dhe sekuestruar një shumë parash që dyshohet se lidhet me rastin.
Nga hetimet e deritanishme, ekziston dyshimi se të njëjtit mund të jenë të përfshirë edhe në dy raste të tjera vjedhjesh të raportuara ditëve të fundit. Njëri prej të arrestuarve ka pranuar përfshirjen në këto raste gjatë intervistimit në polici.
Me urdhër të Prokurorit të Shtetit, të dyshuarit janë ndaluar për 48 orë, ndërsa ndaj tyre është iniciuar rasti “Vjedhje e rëndë”.
