Janë bërë mbi 2 muaj që nga përfundimi i zgjedhjeve lokale.
E ndonëse kryetari i rizgjedhur, Përparim Rama, ende nuk e ka prezantuar kabinetin e tij qeverisës për mandatin e dytë, këtë të premte u mbajt seanca për buxhetin.
Pas dy orësh seancë, me 33 vota për, buxheti u miratua.
I njëjti, për këtë vit, parashihet të jetë mbi 151 milionë euro.
Por jo të gjitha partitë rezultuan të jenë pro miratimit.
Njëra ndër to ishte Lëvizja Vetëvendosje e cila nuk votoi, duke thënë se rritja e buxhetit po paraqitet gabimisht si sukses qeverisës komunal.
“Një problem tjetër shumë serioz është fakti se sot po kërkohet ta votojmë këtë draft-buxhet pa asnjë raport financiar për vitin paraprak. Po na kërkohet t’i votojmë 150 milionë euro pa pikë llogaridhënie. Situata rëndohet edhe më shumë nga fakti se ende nuk kemi diskutuar raportin e auditimit të pasqyrave financiare të komunës sonë. Gjetjet e auditorit kombëtar për keqpërdorime janë në shifra të papara më herët”, tha Gëzim Sveçla nga LVV.
I pranishëm në këtë seancë nuk ishte vetë kryetari Rama.
Mungesën e tij e vuri në dukje Sveçla, i cili në të njëjtë kohë akuzoi Partinë Demokratike të Kosovës që votoi pro kalimit të buxhetit.
Ndaj kësaj deklarate reagoi asamblisti i kësaj partie, Leutrim Retkoceri.
“U përmend këtu që Partia Demokratike e Kosovës ka ndryshu është një realitet. Partia Demokratike e Kosovës në raport me Vetëvendosjen ka ndryshu sepse është forca e dytë politike në Kuvend të kryeqytetit. Venvendosja nga partia e parë është e treta ky është një dallim”.
Retkoceri shtoi se për PDK-në janë më të rëndësishme parimet, sesa kërkesat politike.
“Buxheti nuk është vetëm i një partie politike. Ne si PDK kemi kërkuar në vazhdimësi të ketë transparencë, të ketë dëgjime publike më shumë, të ketë dëgjime publike të Kuvendit, asamblistëve me qytetarë, të ketë planifikim më të mirë dhe të gjitha janë legjitime sepse janë në kuadër të parimeve të buxhetit”, tha ai.
Sveçla më pas pati një kundër replikë lidhur me këto deklarata.
“Unë e kuptoj nevojën e tij pak për me mashtru vetën dhe pak për me i bind anëtarët e Grupit, por të paktën neve të tjerëve nuk mundet dhe nuk ka nevojë me na e shit në këtë mënyrë qysh po tenton. Ky buxhet është jashtëzakonisht i rëndësishëm për kryeqytetin dhe në as një moment LVV-ja nuk tha se është kundër buxhetit, por është kundër projekteve me problem ligjore që janë pjesë e këtij buxheti”, deklaroi Sveçla.
Pro buxhetit votuan edhe Lidhja e Prishtinës dhe Nisma.
Kronikë e realizuar nga gazetarja Adea Mustafaj.
