Qendërmbrojtësi i Prishtinës, Philippe Boueye dhe mbrojtësi i krahut, Najeeb Yakubu janë ftuar nga Kombëtarja e Nigerit për kualifikimet e Kupës së Afrikës.
Lajmin për ftesën e këtyre dy futbollistëve, e ka bërë të ditur Prishtina të martën në rrjetet sociale.
Kombetarja e Nigerit, këtë muaj do t’i ketë dy ndeshje kualifikuese për Kupën e Afrikës dhe do të përballet me Angolën, në shtëpi dhe udhëtim.
Ndeshjen e parë, Nigeri e luan në udhëtim më më 11 tetor, saktësisht të premten kurse të kthimit do ta ketë në shtëpi pas katër ditësh.
Aktualisht, Nigeri zë vendin e dytë në Grupin E kualifikues për Kupën e Afrikës me 6 pikë të tubuara, tri më pak se Maroku që është lider pasi i ka fituar të tria ndeshjet të luajtura deri më tani në kuadër të kësaj kampanje.
Yakubu 24-vjeçar ka regjistruar katër ndeshje deri më tani për Nigerin, ndërsa Boueye 21-vjeçar ka debutuar muajin e shkuar.