Dy kirurgë në Klinikën e Kirurgjisë së Fëmijëve në ShSKUK janë rrahur mes vete të hënën.
Rasti është konfirmuar edhe nga ky institucion.
Mirlinda Qyqalla, zëdhënëse në ShSKUK ka thënë për teve1.info se për rastin janë njoftuar organet e rendit.
“Në Klinikën e Kirurgjisë së Fëmijëve ka ndodhur një incident mes dy punonjësve shëndetësorë. Sipas informatave fillestare, për rastin janë njoftuar organet e rendit, të cilat kanë dalë në vendin e ngjarjes. Për momentin nuk kemi detaje shtesë lidhur me shkaqet”, ka thënë ajo për teve1.info
Për rastin është deklaruar edhe Policia e Kosovës.
Zëdhënësi i PK-së, për kryeqytetin Enis Pllana tha për teve1.info se rasti është iniciuar si sulm.
“Sot rreth orës 08:00, kemi pranuar informatën për një përleshje fizike, e cila ka ndodhë në QKUK në Prishtinë. Bazuar në të dhënat fillestare, në këtë rast janë përfshirë dy persona. Në koordinim me Prokurorin e Shtetit rasti është iniciuar Sulm. Sektori i Hetimeve të Kryeqytetit po merret për sqarimin e plotë të rrethanave të rastit”, tha ai.
