Gara për vendin e parë në fund të stinorit të rregullt të Superligës së Kosovës në basketboll vazhdon të jetë shumë e fortë dhe shumë interesante. Dy xhiro para fundit, Bashkimi është lider me 44 pikë.
Trepça është e dyta me 43 pikë e Sigal Prishtina e treta me 42 pikë.
Dhe ndeshjet që zhvillohen të enjten pritet të jenë shumë të rëndësishme për renditjen përfundimtare, nëse jo vendimtare.
Prej orës 19:00 takohen Sigal Prishtina me Bashkimin dhe Peja me Trepçën. Edhe për Pejën ndeshja është me shumë peshë. Skuadra pejane synon të startojë nga pozita e katërt në plejof. Aktualisht i ka 40 pikë.
Peja është në moment të mirë, ndërsa e favorizon fakti që ndeshjen ndaj kampiones aktuale e luan para tifozëve të saj. Peja në xhiron e kaluar e mposhti Prishtinën me plot 30 pikë dallim. Trepça në xhiron e kaluar ka pasur punë të lehtë me Proton Cable Prizrenin, por ka lëshuar pikë në xhirot e fundit. U mposht nga Prishtina, Ylli e Bora së fundi.
Ndërkohë derbi me Bashkimin e zë Prishtinën në moment goxha të vështirë. Pasi u mposht në finale të Ligës Unike dhe nga Peja me 30 pikë dallim, Prishtina ndau rrugët me trajnerin turk, Murat Bilge. Të martën skuadra prishtinase njoftoi që skuadrën në fazën finale të këtij edicioni do ta drejtojë Albert Sylejmani, ndihmësi i Bilges. Sylejmani edhe më herët ka drejtuar skuadrën prishtinase si kryetrajner.
As Bashkimi i Prizrenit nuk është në momentin më të mirë, ndonëse lider. Në xhiron e kaluar pësoi në shtëpi nga Golden Eagle Ylli. Në fakt Bashkimi ka pasur telashe të mëdha prej se iu lëndua lojtari më i mirë, Jayveous McKinnis. Dhe forca e vërtetë e kësaj skuadre mund të kuptohet në derbin e vështirë me Prishtinën.
Bashkimin e pret ndeshje e vështirë edhe në xhiron e fundit. E pret Pejën. Vështirë do të jetë edhe për Prishtinën, që do të luajë ndaj Vëllaznimit në Gjakovë. Trepça do të ketë punë dukshëm më të lehtë, pasi përballet në shtëpi me Borën. Bora tashmë e ka të sigurt vendin e shtatë, përkatësisht paraqitjen në plejaut.
