Me pranga në duar u soll edhe një herë në gjykatore.
Për herë të dytë pas më shumë se dy viteve, Dushko Arsiq po ulet në vendin e njëjtë për të pritur vendimin e gjykatës.
Edhe në rigjykim, Arsiq u dënua me 13 vite burgim.
“Në emër të popullit e merr këtë aktgjykim, ndaj të akuzuarit Dushko Arsiq, dhe të njëjtin e shpall fajtor për kryerjen e veprës penale, krime lufte kundër popullsisë civile.. e gjykon me dënim burgu me kohë zgjatje 13 viteve me të cilin dënim do të llogaritet koha e kaluar nën masën e paraburgimit prej datës 8 dhjetor 2021 deri në plotë fuqishmërisë së këtij aktgjykimi”, shpalli vendimin, Vesel Ismaili – kryetar i Trupit Gjykues.
Kryetari i trupit gjykues, Vesel Ismaili, dha edhe arsyetimin për këtë aktgjykim.
“Në tërësi është vërtetuar se i akuzuari Dushko Arsiq, ka qenë pjesmarrës me forcat ushtarake serbe që kanë kryer keqtrajtime dhe vrasje në fshatin Butovc, Komuna e Prishtinës që këtë e kanë vërtetuar dëshmitarët siç janë Artan Krasniqi, Syl Imeri, të cilët edhe këtu në sallën e gjykimit e kanë identifikuar të akuzuarin Dushko Arsiq se ka qenë pjesëmarrës me forca tjera policore dhe paramilitare serbe”, u shpreh ai.
Sipas tij, gjatë gjithë procesit gjyqësor nuk pati ndonjë provë direkt apo indirekte që e shfajësonte të akuzuarin për veprën penale.
Arsiq ishte dënuar njëjtë edhe më 2 shkurt të vitit 2024, por Gjykata e Apelit e ktheu rastin në rigjykim.
Dushko Arsiq është i akuzuar se ka marrë pjesë në vrasjen e B.Sh më 20 prill 1999 në Butovc të Prishtinës, si dhe ka maltretuar fizikisht e psiqikisht të dëmtuarin A.K..
Aktakuza e bënte përgjegjës Arsiqin edhe për keqtrajtimin e civilëve shqiptarë, plagosje, si dhe për vrasje.
