Në Gjykatën Speciale në Hagë, dëshmitari John Duncan deklaroi të hënën se dhuna e shpërthyer pas përfundimit të luftës në Kosovë nuk ishte e organizuar nga Ushtria Çlirimtare e Kosovës (UÇK), por kishte karakter hakmarrës dhe kriminal.
“Në mënyrë të pavarur, jo. Për shkak se me sa e kuptonim ne, nuk ishte dhunë e orkestruar. Ajo që donim ne ishte që ai [Thaçi] të lëshonte thirrje ndaj kosovarëve që të përmbaheshin”, tha Duncan.
Ai shtoi se Hashim Thaçi kishte bërë thirrje për qetësi, por nuk kishte pasur mundësi që ta zbatonte në praktikë një gjë të tillë.
“Si çdo politikan, ai mund të lëshonte thirrje për qetësi, por nuk ishte në gjendje që ta zbatonte një gjë të tillë për shkak se nuk ishte e organizuar nga UÇK-ja”, theksoi dëshmitari.
Deklarata e Duncan-it erdhi pasi u pyet nga avokatja Nina Tavakoli nëse Thaçi mund të kishte ndalur dhunën e vitit 1999. Sipas tij, krejt ajo që ishte kërkuar nga Thaçi në atë kohë ishte pikërisht thirrja për përmbajtje.
Me këtë dëshmi përfunduan pyetjet e mbrojtjes së Hashim Thaçit, ndërsa seanca do të vazhdonte me pyetjet e mbrojtjes së Kadri Veselit, të përfaqësuar nga avokati Rodney Dixon.
