Sipas tij, kjo çështje është shumë e rëndësishme për shqiptarët për faktin se tregon integrimin dhe pjekurinë e tyre.
“Pa dyshim që për shqiptarët është shumë e rëndësishme, pasi që kjo tregon integrimin e shqiptarëve, pjekurinë e tyre, dhe ajo që unë e vë si pikë, është fakti i integrimit të shqiptarëve dhe hapja e dyerve për një politikë të re, bashkëpunuese dhe integruese në Mal të Zi, dhe kjo do të fillojë me erën e Abazoviq”, tha Dukaj në emisionin “Infonata” në Tëvë1.
Dukaj po ashtu tha se Abazoviq ka thyer tabu në Mal të Zi për shkak se më herët ka qenë edhe kryetar i një partie qytetare malazeze.
Mirëpo, kjo thyerje e akullit nga ai, do të jetë shumë e rëndësishme për gjeneratat e reja që kanë synim politikën, tha tutje ai.
“Së pari kjo për shqiptarët do të thotë shumë, në rend të parë do të thotë që integrimi i shqiptarëve këtu në Mal të Zi është pa dyshim shumë i rëndësishëm, sepse Dritan Abazoviq para se të bëhej kryeministër, ajo çfarë është e rëndësishme për mua është fakti se ai ishte edhe kryetar i një partie qytetare malazeze, gjë që deri më tani ka qenë në një farë mënyre tabu në Mal të Zi, dhe ai arriti ta thejë këtë akull shumë të rëndësishëm e sidomos për gjeneratat e reja të cilat dëshirojnë të merren me politikë”, tha tutje Dukaj.
Gjithashtu, sipas Dakaj, Abazoviq arriti të bëjë një bashkim të strukturave politike.
Ndërkaq, Dakaj thotë se Abazoviq, dëshmoi që në politikë është gjithçka e mundur, për shkak se në Mal të Zi gjithmonë kryeministra kanë qenë vetëm serb apo malazez.
“Dritani, arriti të bëjë një bashkim të strukturave politike, pro serbe, malazeze, shqiptare, boshnjake e kështu me radhë. Të gjithë neve këtu na dëshmoj që në politikë është gjithçka e mundur, por ajo që ka më së shumti rëndësi fakti se ai dëshmoi që në Mal të Zi edhe një shqiptar mund të jetë kryeministër, e jo gjatë tërë kohës vetëm serb e malazez”, tha ai.
