Kreu i Federatës Shqiptare të Futbollit (FSHF), Armand Duka, ka reaguar për herë të parë për rastin e kapitenit të Kosovës U21, Etnik Brruti, duke thënë se nuk duhet mërzitur pse ai ka vendosur ta vesh fanellën e Shqipërisë.
Rasti i Brrutit nxiti shumë reagime ditëve të fundit pasi mesfushori i Malishevës ka vendosur ta pranojë ftesën e selektorit të Shqipërisë, Sylvinho dhe pritet të jetë gati për ndeshjet e marsit.
Në një intervistë, Duka ka bërë të ditur se po presin që Brruti ta marrë vizën angleze me kohë që të jetë i gatshëm për ndeshjen kundër Anglisë në “Wembley” më 21 mars për kualifikimet e Botërorit.
“Nuk kemi pse mërzitemi, ne jemi bërë krenarë që Xhaka luan me Zvicrën, tani mërzitemi se pse Brruti luan me Shqipërinë. Brruti e ka marrë pasaportën dhe kemi aplikuar dhe për vizën angleze dhe uroj ta kemi në kohë”, ka thënë ai.
Kryetari i FSHF-së i jep të drejtë reagimit të babait të Brrutit, i cili pati thënë se zgjedhja e djalit të tij nuk është tradhti, por “besnikëri ndaj idealit për të cilin kemi luftuar”. Duka ka shtuar se për Shqipërinë mund të luajë kushdo që ndihet shqiptar.
Duka pati përgjigje edhe për akuzat e përzgjedhësit të Kosovës U21, Afrim Tovërlani, që ka thënë se lojtarët po shkojnë te Shqipëria për ta marrë pasaportën shqiptare që të luajnë në Rusi.
Kryetari i FSHF-së ka thënë se nuk është ky qëllimi, ku ka përmendur rastin e Brrutit, duke shtuar se ishte dëshirë e lojtarit që të luante për Shqipërinë.
Nga Kosova U21 si kapiten në të kaluarën në drejtim të Shqipërisë ishte larguar edhe Ardian Ismajli. Kapiten ishte edhe Edvin Kurtulush që iu bashkua Suedisë.
Më pas nisi një valë e re e largimeve, ku Arbër Hoxha, Mirlind Daku, Arbnor Muja ishin treshja e radhës për të cilët u diskutua shumë në Kosovë.
Përveç tyre nga Kosova janë larguar për arsye të ndryshme edhe Adrion Pajaziti, Medon Berisha e Dion Berisha.
