Federata Shqiptare e Futbollit (FSHF), ka mirëpritur vendimin e Komitetit Ekzekutiv të UEFA-s, i cili i ka dhënë të drejtën Shqipërisë të jetë një nga vendet organizatore të Evropianit U21 të vitit 2027.
Ky turne që zhvillohet në qershor të vitit 2017, do të bashkë-organizohet me Serbinë kurse Shqipëria për herë të parë do ta ketë mundësinë të paraqitet me gjeneratën e saj në këtë ngjarje.
Kreu i FSHF-së, Armando Duka ka thënë se Evropiani që do të organizohet me Serbinë, do të jetë më shumë sesa një turne futbolli.
Sipas tij, do të shërbejë si një katalizator për të thyer barriera, për të forcuar mirëkuptimin e ndërsjellë dhe për të krijuar një të ardhme më pozitive për popujt e Shqipërisë dhe Serbisë.
“Ky do të jetë eventi më i madh sportiv në historinë e Shqipërisë. Prandaj, ai na jep mundësinë që, me mbështetjen e UEFA-s, të modernizojmë stadiumet dhe infrastrukturën e futbollit në të gjithë vendin. Gjithashtu, ky organizim do të krijojë një trashëgimi të qëndrueshme për të frymëzuar brezat e ardhshëm të lojtarëve, vullnetarëve dhe tifozëve në të dyja vendet”, ka thënë Duka.
Dy vendet organizatore do të mirëpresin secila nga tetë ekipe pjesëarrëse, ndërsa ekipet do të luajnë në vendin e tyre pritës deri në finalen e madhe, e cila do të zhvillohet në “Arenën Kombëtare” në Tiranë.
