Dugolli, fillimisht i pyeti anëtarët e këtij Komisioni për arsyen e ftesës për t’u intervistuar, me ç’rast tha se në këtë periudhë ka udhëhequr një dikaster tjetër, atë të Tregtisë dhe Industrisë.
“Në nivel qeveritar, Ministria e Financave dhe e Zhvillimit Ekonomik është marr me këtë çështje”, tha Dugolli.
Megjithatë, Dugolli shtoi se kontributi i tij në këtë fushë ka qenë mbështetja e strategjisë për energji.
Deputeti i LDK-së, Armend Zemaj, e pyeti Dugollin për veprimtarinë e tij si ministër.
“A mundet zotëri Dugolli, nëse keni qenë pjesë e ndonjë komiteti ndërministror, për shitblerje, për privatizim dhe a ka qenë pjesë e bordit të AKM-së. Cila ka qenë veprimtaria jote si ministër në këtë çështje, pra të energjisë”, e pyeti Zemaj.
Kurse ish-ministri Bujar Dugolli, tha se si ministër veprimet e tij kanë qenë të kufizuara.
“Te sektori i energjisë, Qeveria e Kosovës nuk ka pasur kompetencë në sektorin energjetik dhe të thëngjillit”, tha Dugolli.
Komisioni hetimor për energji është ngritur nga Kuvendi i Kosovës për shkak të përballjes me mungesë të energjisë së vendit kohëve të fundit si dhe shtrenjtimit të saj. /EO/
