Ish-deputeti i Lëvizjes Vetëvendosje, Enver Dugolli, ka komentuar protestën e mbajtur në Tiranë në mbështetje të ish-krerëve të Ushtrisë Çlirimtare të Kosovës, duke thënë se shqiptarët gjithmonë duhet të kërkojnë drejtësi, pasi janë viktima e jo autorë të krimeve.
Ai tha këto protesta ngjasojnë me një post-mortem.
“Gjithmonë shqiptarët duhet të kërkojnë drejtësi, për shkak se ne jemi viktima, sepse shqiptarët nuk kanë bërë krime. Unë thellësisht besoj në pastërtinë e luftës së Ushtrisë Çlirimtare të Kosovës”, tha ai në emisionin “Këndi i Debatit” në Tëvë1.
Sipas tij, reagimi i tanishëm vjen shumë vonë, pasi momenti i vërtetë për të kundërshtuar ishte në kohën kur ishte ideja për themelimin e Gjykatës Speciale.
“Atëherë kur është dashtë që të rezistohet e të kundërshtohet themelimi i kësaj Gjykate, mjerisht eksponentë politikë me ndikim kanë qenë në anën e kundërt. Vetëvendosje e ka kundërshtuar që nga fillimi këtë ide, sepse kemi besuar dhe besojmë në pastërtinë e luftës çlirimtare, dhe nuk kemi pasur nevojë për një Gjykatë Speciale”, deklaroi ai.
Dugolli kujtoi se LVV kishte organizuar protesta në atë kohë, madje kishte pasur edhe arrestime të aktivistëve, duke theksuar se sot nevojitet reflektim nga ata që e mbështetën Gjykatën. Sipas tij, ata që e kanë votuar këtë Gjykatë duhet edhe të kërkojnë falje para qytetarëve.
“Duhet të jemi më racionalë dhe të shohim me gjakftohtësi se ku ishin disa që sot kanë ndërruar mendje. Është mirë që kanë reflektuar, por opinioni publik ka nevojë për një kërkim falje nga ata që e votuan themelimin e kësaj Gjykate”, përfundoi ai. /teve1.info/
