Enver Dugolli nga LVV ka deklaruar se nuk ekziston asnjë urgjencë për veprim të nxituar, duke u bazuar në praktikat e deritanishme të Gjykatës Kushtetuese.
Ai ka thënë se shumë çështje kanë mbetur me vite në sirtarët e Gjykatës Kushtetuese dhe se duhet pritur aktgjykimi i plotë, veçanërisht sa i përket zbatimit të tij.
Sipas tij, qëndrimi ndaj Listës Serbe nuk ka ndryshuar, duke shtuar se kjo parti mbetet e njëjtë si më parë.
Ai ka potencuar se nënkryetari i Kuvendit nga komuniteti serb duhet të jetë një deputet që përfaqëson komunitetin serb, që gjithashtu e njeh Republikën e Kosovës.
Dugolli ka deklaruar se ekziston mundësia për të zgjedhur një kandidat nga komuniteti serb që vjen nga një parti tjetër, e cila ka fituar një mandat në Kuvend.
“Është një nguti për shkak se nuk ka kurrgjë urgjente, duke analizuar punën e Gjykatës Kushtetuese vendimet e ndryshme, çështjet e ndryshme që kanë ngec në sirtart e Kushtetueses ka pasur me vite, ne do të presim aktgjykimin e plotë në kuptimin e zbatimit të këtij aktgjykimi, mendoj që vullneti i deputetit për të votuar dikë është i patjetërsueshëm, nuk mund ta detyron askush deputetin të voton pro një propozimi. Nuk ka ndryshuar asgjë për të pas një qëndrim ndryshe për Listën Serbe, ata janë të njëjtit. Nënkryetari i Kuvendit nga komuniteti serb duhet të jetë një deputet që përfaqëson komunitetin serb por që edhe e njeh Republikën e Kosovës. Ne e kemi një mundësi që ta zgjedhim një kandidat nga komuniteti serb, një parti e cila ka fitua një mandat, ne do të kemi një votë për një përfaqësues të komunitetit serb që është deputet. Nuk do ta lejojmë që të mbetet peng konstituimi i Kuvendit”, ka deklaruar Dugolli në emisionin “Ditari” në tëvë1.
Ndryshe, Gjykata Kushtetuese e Kosovës ka vendosur se zgjedhja e Nenad Rashiqit në pozitën e nënkryetarit të Kuvendit të Kosovës nga radhët e komunitetit serb nuk është bërë në përputhje me dispozitat kushtetuese.
Në aktgjykimin e publikuar dy ditë më herët, Gjykata ka sqaruar se e drejta për të propozuar nënkryetarin e Kuvendit nga radhët e komuniteteve që nuk janë shumicë i takon grupit parlamentar që ka numrin më të madh të deputetëve brenda atij komuniteti, në këtë rast komunitetit serb.
Ndërsa, sa i përket zgjedhjes së Kryetarit të Kuvendit, Dugolli u shpreh se LVV do duhet të propozoj Albulena Haxhiun për kryetare të Kuvendit, pasi kjo e fundit sipas tij, ka qenë gruaja më e votuar në zgjedhjet e kaluara dhe në zgjedhjet e fundit të 28 dhjetorit.
“Emri i Albulena Haxhiu duhet të jetë propozimi për kryetare të Kuvendit, për shkak se është gruaja më e votuar në Kosovë edhe në zgjedhjet e kaluara edhe tani”, ka thënë ai ndër të tjera./teve1.info/
