Të martën mbrëma është kompletuar seti i skuadrave që do të përballen në fazën çerekfinale të Kampionatit Evropian.
Padyshim se ndeshjet e kësaj faze do të jetë tejet interesante dhe të fortë, ku disa prej tyre mund të vlerësohen edhe si finale para finales.
Përballjet çerekfinale nisin të premten dhe përfundojnë të shtunën mbrëma kur edhe do të mësohen katër kombëtaret që do të avancojnë në gjysmëfinale të “Euro 2024”.
Përballja e parë e fazës çerekfinale do të jetë ajo ndërmjet Spanjës dhe Gjermanisë, dy kombëtare këto që prej fillimit të Evropianit janë vlerësuar favorite për të triumfuar.
Kjo ndeshje luhet të premten prej orës 18:00 në qytetin e Stuttgartit. Pas përfundimit të këtij dueli, të premten por prej orës 21:00 na pret një përballje tjetër interesante në kuadër të çerekfinales.
Në Hamburg do të luajnë Franca dhe Portugalia, ku gjithashtu do të jetë interesante edhe përballja ndërmjet Kylian Mbappet e Cristiano Ronaldon. Fituesit e këtyre dy çerekfinaleve do të përballen me njëri tjetrin në gjysmëfinale të këtij turneu.
Të shtunën në të njëjtin orar do të luhen dy ndeshjet e fundit të fazës çerekfinale.
Prej orës 18:00, Anglia dhe Zvicra do të luajnë njëra me tjetrën në Dusseldorf, ndërsa në orën 21:00 do të jetë përballja midis Holandës dhe Turqisë në Berlin.