Sonte, zhvillohen 4 duele tjera në Ligën e Kampionëve, në fazën e 1/8 së finales.
Duele interesante pritet të jenë të gjitha, por ndeshjet që spikasin më shumë do jenë ato ndërmjet Bayern Munchenit e Bayer Leverkusenit, si dhe Paris Saint-Germainit e Liverpoolit.
Bayerni është lider në Bundesligë, ka tetë pikë më shumë se kampioni në fuqi, Leverkuseni. Por, Leverkuseni nuk ka humbur asnjëherë nga Bayerni prejse skuadrën e drejton Xabi Alonso.
Leverkuseni në 1/8 e finales së Championsit kaloi direkt, duke përfunduar në vendin e gjashtë në fazën e ligës. Nga tetë ndeshje i mblodhi 16 pikë. Bayerni përfundoi i 12-ti me 15 pikë dhe u paraqit në play-off.
Me shumë interesim pritet ndeshja mes PSG-së dhe Liverpoolit, që zhvillohet në “Parkun e Princave”.
Lideri i kampionatit francez, PSG, kishte fazë të ligës të vështirë, ndërsa në 1/8 e finales e kaloi lehtë Brestin. Ndërkohë, Liverpooli pos që është lider në Premier League, ishte lider edhe në fazën e ligës.
Interesante është edhe ndeshja mes Benficas e Barcelonës. Dy skuadrat u përballën në kuadër të xhiros së shtatë të fazës së ligës, ndërsa fitore 5:4 në Lisbonë shënoi Barcelona.
Të gjitha këto takime fillojnë nga ora 21:00, ndërsa prej orës 18:45 është ndeshja Feyenoord – Inter.
Interi është skuadra e vetme italiane në këtë fazë të garës. Ndërkohë, Feyenoordi për trajner ka emëruar Robin van Persien, kurse në raundin e plejofit e eliminoi Milanin.
