Drita ka shkruar histori duke u bërë skuadra e parë kosovare që kalon në raundin e dytë të Ligës së Kampionëve
Pas fitores heroike ndaj Differdange 03, Drita është kualifikuar për në raundin e dytë të Ligës së Kampionëve, një sukses historik për futbollin kosovar. Tani gjilanasit do të përballen me gjigantët danezë të FC Copenhagen.
Në rast se Drita eliminohet nga Copenhagen, rrugëtimi evropian nuk përfundon. Ata do të zbresin në Ligën e Evropës, ku do të garojnë në “Champions Path” dhe janë pjesë e vazos së ekipeve favorite.
Kjo do të thotë se Drita do të përballet me një kundërshtar nga vazoja e jo-favoriteve, pra një ekip që ka koeficient më të ulët dhe që është eliminuar në raundin e dytë të Ligës së Kampionëve. Kjo rrit shanset për të kaluar edhe një raund tjetër.
Kundërshtarët e mundshëm të Dritës janë skuadrat që humbin nga këto përballje të raundit të dytë:
KuPS (Finlandë) – Kairat (Kazakistan)
Breiðablik (Islandë) – Lech Poznań (Poloni)
Noah (Armeni) – Ferencváros (Hungari)
Hamrun Spartans (Maltë) – Dynamo Kyiv (Ukrainë)
Shkëndija (RMV) – FCSB (Rumani)
Shelbourne (Irlandë) – Qarabağ (Azerbajxhan)
Skuadra e Zekirija Ramadanit ka një motivim shtesë: nëse kalon edhe raundin e tretë në Ligën e Evropës, përveç se do të luajë në “play-off” të kësaj gare, automatikisht siguron fazon e grupeve të Ligës së Konferencës, një sukses i jashtëzakonshëm në nivel evropian.
Kjo mund të jetë sezoni më i madh në histori për Dritën, me mundësi reale për t’u futur për herë të parë në një fazë grupore të një gare të UEFA-s.
