Ndeshja e parë e raundit të tretë kualifikues të Ligës së Evropës ndërmjet Steauas dhe Dritës, po konsiderohet nga UEFA si një ndeshje me rrezik të lartë dhe skuadra nga Gjilani po merr masa ekstreme.
Mediumet në Rumani kanë raportuar se Drita ka vendosur që në Bukuresht të udhëtojë pa tifozë dhe ka paraqitur një propozim surprizues për ndeshjen e kthimit në Prishtinë.
Thuhet se Drita po përgatitet të parandalojë çdo incident të mundshëm, duke u bazuar në ndeshjen ndërmjet Rumanisë dhe Kosovës që u ndërpre për shkak të thirrjeve kundër Kosovës.
Drita thuhet se ka informuar si Steauan ashtu edhe UEFA-n, se nuk do të ketë asnjë tifozë për ndeshjen që luhet në Bukuresht, duke kufizuar kështu çdo problem të mundshëm në tribuna.
Për më tepër, duke parashikuar një atmosferë të tensionuar, kampioni i Kosovës doli me një sugjerim të papritur për ndeshjen e kthimit, që luhet javën tjetër në Prishtinë: kërkoi nga Steaua të mos sjellë tifozë.
Te Steaua nuk presin numër të madh tifozësh në tribuna për ndeshjen e parë që luhet të enjten prej orës 20:30.
Zyrtarët e klubit rumun, po parashikojnë që në stadium të jenë të pranishëm rreth 10.000 – 15.000 tifozë.
