Dueli që do të luhet në Gjilan, ndërmjet Dritës dhe Llapit, do ta mbyll xhiron e 14-të në Superligën e Kosovës në futboll.
Kjo ndeshje luhet sot prej orës 13:00 dhe është njëri prej dy derbive të kësaj xhiroje pas atij Prishtina – Ballkani, që përfundoi të dielën pa fitues.
Drita ka treguar kryesisht formë stabile deri më tani, ndërsa Llapi është në një seri negative dhe synon që në këtë derbi të rikthehet te fitorja.
Llapi që renditet në pozitët e tetë në tabelë, e cila dërgon edhe në barazh nuk di për fitore në gjashtë ndeshjet e fundit, ku ka regjistruar 3 barazime dhe po aq humbje.
Ka 16 pikë të tubuara, 12 më pak se Drita që prinë në tabelë dhe në tetë ndeshjet e fundit ka pesë fitore e tri barazime.
Pra, ekipi i trajnerit Zekirija Ramadani nuk di për humbje prej xhiros së pestë, të cilën ia ka shkaktuar pikërisht skuadra e Llapit, që e pati mposhtur 1:0 në stadiumin “Zahir Pajaziti” në Podujevë.
Në rast se Drita fiton derbin ndaj Llapit, atëherë do të shkëputej edhe më shumë në tabelë pasi aktualisht ka dy pikë më shumë se kampioni në fuqi, Ballkani.
Në anën tjetër, Llapi me fitore kundër Dritës, do të “kërcente” në pozitën e pestë në tabelë.
