Kupa e Kosovës do t’i vë përballë sot dy prej ekipeve më të mira të pasluftës në futbollin kosovar.
Drita dhe Prishtina do të ballafaqohen mes vete në ndeshjen e parë gjysmëfinale të kësaj gare.
Dueli i parë do të luhet sot në stadiumin me bar artificial në Gjilan, e cila do të nisë prej orës 15:00.
Gjilanasit tashmë e kanë thuajse në dorë titullin e kampionit të Kosovës, ndërsa synojnë të jenë të suksesshëm edhe në garën prestigjioze.
Nga ana tjetër, kryeqytetasit i kanë shpresat e mëdha që përmes Kupës të dalin në Evropë pasi siç dihet, fituesi i kësaj gare e siguron automatikisht edhe pjesëmarrjen në garat evropiane.
Prishtinasit me trajnerin e ri, Arsim Thaqi synojnë ta nisin një epokë të re pas rezultateve të zbehta me trajnerin francez, Jean-Michel Cavalli.
Kjo do të jetë përballja e parë gjysmëfinale, kurse ajo e kthimit do të luhet në kryeqytet.
E nesër do të luhet ndeshja e dytë gjysmëfinale, ajo mes Drenicës dhe Llapit.
