Drita dhe Prishtina kanë pësuar humbje si vendas dy javë para përfundimit të kampionatit.
Në xhiron 34-të të Superligës së Kosovës në futboll, ku të gjitha ndeshjet janë zhvilluar në të njëjtin orar, Drita është mposhtur nga Dukagjini e Prishtina nga Gjilani.
Ballkani ka vazhduar serinë pozitive duke e mposhtur Ferizajn, ndërsa Malisheva ka fituar me rezultat të ngushtë ndaj Feronikelit. E, Suhareka ka regjistruar fitore kundër Llapit.
Në Gjilan, Drita është befasuar nga Dukagjini, që ka siguruar një fitore minimale 1-0 falë një penalltie të realizuar nga Berisha.
Ndërkohë, në kryeqytet, Prishtina është mposhtur nga Gjilani me rezultat 2-1. Kqiku e ka zhbllokuar ndeshjen që në minutën e tetë, ndërsa Jarovic e ka vulosur fitoren në minutën e tetëdhjetë e një. Golin e vetëm për Prishtinën e ka realizuar Gnapi Dable në minutën e dyzet e nëntë.
Drita tashmë kampion gjendet në krye të tabelës me 70 pikë, nëntë më shumë se Ballkani në vendin e dytë. Në vendin e fundit gjendet Feronikeli me vetëm pesëmbëdhjetë pikë, skuadër që tashmë ka rënë nga liga. Deri në përfundim të kampionatit kanë mbetur edhe dy xhiro.
