Pas një sezoni të mbushur me emocione, sfida dhe triumf, basketbollisti i mirënjohur kosovar Drilon Hajrizi ka ndarë një mesazh prekës dhe frymëzues me ndjekësit e tij, duke reflektuar mbi rrugëtimin e tij drejt titullit kampion me ekipin e Mitrovicës.
Në një postim në rrjetet sociale, Hajrizi zbulon sfidën e madhe me të cilën është përballur në fillim të sezonit – një goditje jo në fushë, por në shëndet. “Ishte një sprovë që më tronditi deri në palcë dhe më vuri përballë pyetjes më të vështirë: a do të mundem të rikthehem?”, shkruan ai, duke treguar momentet e vështira dhe rrugën drejt rikuperimit.
Pavarësisht pengesave, Hajrizi tregon se vendosmëria dhe besimi nuk e lanë të dorëzohej. “Nuk isha gati të largohem nga loja. Çdo ditë rikuperimi ishte si një pikëz shprese, si një hap drejt parketit, drejt ëndrrës sime që vlonte brenda meje.”
Dhe rikthimi i tij nuk ishte thjesht simbolik. Me përkushtim dhe përpjekje, ai u kthye për të udhëhequr ekipin drejt sukseseve të reja, duke përfunduar sezonin si kampion. “Ky moment është më shumë se një fitore sportive, është një dëshmi e gjallë se besimi dhe këmbëngulja i japin kuptim çdo rikthimi.”
Basketbollisti ka shprehur falënderime të veçanta për Zotin, familjen, ekipin, trajnerët dhe të gjithë ata që e kanë mbështetur në këtë rrugëtim, ndërsa mesazhi i tij i fundit është një thirrje frymëzuese për të gjithë ata që përballen me sfida: “Ky titull është për të gjithë ata që ecin përpara edhe kur rruga është e pjerrët, sepse zemrat e mëdha nuk ndalen kurrë, për sa kohë vazhdojnë të rrahin!”
Drilon Hajrizi mbyll mesazhin e tij me një urim për qytetin që përfaqëson: “Urime Mitrovicë!”
