Deputeti i Aleancës për Ardhmërinë e Kosovës, Shemsedin Dreshaj, e ka kritikuar Qeverinë Kurti për menaxhimin me shëndetësinë në vend, raporton teve1.info
Gjatë një konference për medie, Dreshaj ka thënë se ministria e Shëndetësisë është ministri e eksperimenteve në Kosovë.
Kjo është arsye sipas tij që ka largim të profesionistëve shëndetësor nga Kosova dhe shumë dështime të tjera.
“Sot, shteti jonë po përballet me Qeverisje ad-hoc me veprime post-festum, pa strategji, pa prioritete dhe pa ofrim të perspektivës për vendin. Asnjë dikaster qeverisës për dy vite të Qeverisjes Kurti nuk mund të merret si mostër e suksesit. Ne sot, e kemi analizën dhe fokusin në sektorin vital të Shëndetësisë”, ka thënë ai.
Dreshaj dha disa argumente për gjendjen siç e quajti të rëndë në shëndetësi.
“Ministria e Shëndetësisë në Qeverisjen Kurti ka qenë Ministri e Eksperimenteve, ku për disa herë radhazi u ndërruan Ministrat, u ndërruan shefat e reparteve e madje kishte raste ku këto pozita mbetën boshë për muaj të tërë pa udhëheqës, duke bërë që të pësojnë qytetarët dhe shëndeti i tyre. Nuk menaxhohet shëndetësia me UD të pa përvojë dhe të padëshmuar”, tha Dreshaj.
Sipas tij, pakënaqësitë deri më sot kanë qenë të shumta.
“Dje, mjekët në specializim të cilët janë forca shtytëse e Shëndetësisë dhe punëtorët e administratës protestuan për padrejtësitë e bëra në Ligjin e Pagave. Është penguese në organizim të punës dhe diskriminuese mos pagesa e kujdestarive dhe mos stimulimi për rrezikshmëri. Disa herë si AAK ia kemi tërhequr vërejtjen qeverisjes Kurti, si në Parlament ashtu edhe në Komisione, për këtë diskriminim i cili dje rezultoi për këtë protestë”, tha tutje Dreshaj.
