Deputeti i Aleancës për Ardhmërinë e Kosovës, (AAK), Shemsedin Dreshaj në një konferencë për medie të hënën ka folur lidhur me gjendjen e shëndetësisë në Kosovë.
Dreshaj madje tregoi se kanë filluar mbledhjen e nënshkrimeve për seancë të jashtëzakonshme për shëndetësinë dhe sigurimet shëndetësore.
Ai ka thënë se Kosova vazhdon të jetë ndër vendet e vetme që s’ka sigurim shëndetësor, teksa përmendi edhe mangësitë në legjislacion.
Dreshaj po ashtu ka vlerësuar se shëndetësia urgjentisht duhet të jetë prioritet i Qeverisë Kurti.
“Ne si Grup Parlamentar i AAK-së, kemi filluar me mbledhjen e nënshkrimeve për një seancë lidhur me sigurimet shëndetësore dhe gjendjen në QKUK. Gjendja është e mjerueshme ku ende po rriten listat e pritjes dhe problemet tjera sikurse infrastruktura e dobët. Po ashtu edhe me ikje të personelit shëndetësor. Pastaj mangësitë tjera në legjislacion. Pa sigurime shëndetësore, si vendi i vetëm që nuk kemi sistem shëndetësor. Urgjent shëndetësia të bëhet prioritet i qeverisë”, është shprehur Dreshaj .
Deputeti i AAK-së ka kërkuar që të hartohet strategjia për shëndetësi dhe të aprovohet ligji për sigurime shëndetësore.
