Analisti politik, Xhavit Drenori, në emisionin “Ditari” në Tëvë1, ka komentuar situatën politike të krijuar rreth ngërçit institucional dhe formimit të Kuvendit të Kosovës. Ai tha se vendimi i Gjykatës Kushtetuese për këtë çështje po afrohet dhe është i qartë sa i përket të drejtës së partisë fituese.
“Sipas aktgjykimit të Gjykatës Kushtetuese, është e pakontestueshme që e drejta për të propozuar kryetarin e Kuvendit i takon partisë së parë. Nuk mund të vendosë një parti që ka marrë 17% të votave, kur ajo që ka mbi 40% ka legjitimitetin,” u shpreh Drenori.
Ai shtoi se Vetëvendosje po i përmbush obligimet e saj kushtetuese: “Nëse VV-ja nuk do ta kryente punën e vet, duke propozuar kandidat çdo 48 orë, atëherë gishti do të duhej të drejtohej kah ata. Por VV-ja po e bën punën, ndërsa bllokada po vjen nga opozita.”
Në një debat të ashpër me analistin Shemsi Jashari, Drenori theksoi se Albin Kurti ka të drejtë të udhëheqë vendin:
“O Albin Kurti ka të drejtën ta qeverisë këtë vend. Sa të doni mundohuni, se si person ai i ka votat. Nuk keni çfarë t’i bëni me akuza për hajni, sepse ai nuk i merr,” tha ai në fund.
