Analisti politik, Xhavit Drenori, thotë se me situatën e krijuar politike zgjidhja e vetme për të dalë nga “ngërçi” politik janë zgjedhjet.
Drenori këtë mundësi e sheh si rezultat i mos realizimit të një marrëveshjeje mes partive politike, pasi thotë që secila parti po kalkulon “matematikat e veta”.
“Dalja e Albulenës sot para zgjedhje, për mendimin tim ka dhënë një kahje, e cila unë e shoh që zgjidhje fatkeqësisht kanë me qenë vetëm zgjedhjet. Zgjidhje janë vetëm zgjedhjet. Proceduralisht, njëherë duhet të konstituohet Kuvendi, sepse duhet të shpërbëhet pastaj ai kuvend. Por, kur ka një marrëveshje politike gjithçka kalohet. Në këtë fazë, nuk ka marrëveshje politike, sepse secili janë duke kalkuluar me matematikat e veta”, deklaroi ai në emisionin “Këndi i Debatit” në Tëvë1.
Ai thotë se tashmë subjektet politike skenarin që po e lexojnë janë zgjedhjet.
“Tash me të madhe flitet brenda partive që madje mund ta kenë si skenarin më të afër zgjedhjet që për neve si vend e si shtet është fatkeqësi, sepse nuk kemi kohë e luks. Prandaj, mendoj që nuk duhet të ndodhin zgjedhjet, por ja që në demokraci, kjo është njëra ndër instrumentet që zgjedhjet mund të jenë zgjedhje. Unë edhe në fillim kam thënë kur ka dalë rezultati i zgjedhjeve të 9 shkurtit, që ky rezultat ka prodhuar dy pole, nuk ka lënë tjera alternativa. E ka prodhuar polin e VV-së me minoritete eventualisht edhe me Nismën, dhe e ka lënë mundësinë e dytë ish-opozita”, tha Drenori./teve1.info/
