FC Drenica ka reaguar në rrjetet sociale ndaj një grupi të tifozëve të skuadrës, që një ditë më parë, kishin kërkuar shkarkimin e trajnerit, Bylbyl Sokoli.
Grupi i tifozëve “Shqiponjat e Zeza”, përmes një reagimi në Facebook, kishin kërkuar shkarkimin e trajnerit Sokoli për rezultatet e dobëta dhe arrogancën sipas tyre të shprehur ndaj tifozëve.
Klubi, në reagimin zyrtar, këtë deklaratë e ka quajtur tendencioze, me synim që ta dëmtojë skuadrën dhe se nuk do të lejoj ndërhyrjen nga jashtë, nga persona të caktuar.
Reagim zyrtar i FC Drenica
Deklarata e publikuar nga një grup i caktuar brenda klubit te tifozësh është tendencioze, dashakeqe dhe aspak e rastësishme.
Qëllimi i saj është i qartë: të dëmtojë klubin në prag të ndeshjeve të rëndësishme që na presin.
Kryesia, Kryetari dhe Zëvendëskryetari i klubit janë 100% pas trajnerit Bylbyl Sokoli dhe lojtarëve tanë.
Për herë të parë, FC Drenica ka një kryesi të fortë, me vendime që nuk lejojnë ndërhyrje nga jashtë. Pikërisht kjo nuk i pëlqen disa personave të caktuar, të cilët mund të kenë synime të këqija.
Ne e bëjmë të qartë se nuk i marrim për bazë reagime të orkestruara, të cilat nuk përfaqësojnë vullnetin e tifozëve të vërtetë të Drenicës. Klubi vazhdon rrugëtimin e tij me unitet, përkushtim dhe besim të plotë në stafin dhe futbollistët tanë.
