Komuna e Drenasit po përballet me mungesë të ujit tash e shtatë ditë pas vërshimeve të fundit, ka bërë të ditur kryetari i komunës, Ramiz Lladrovci.
Për shkak të situatës së rënduar, është marrë vendim që edhe procesi mësimor të shtyhet për dy ditë.
Lladrovci tha se mungesa e ujit dhe kushteve elementare ka pamundësuar frekuentimin e shkollës nga nxënësit.
“Kemi mungesë të ujit në shumë familje në Drenas. Tashmë janë bërë shtatë ditë pa ujë, ndërsa mungojnë edhe kushtet e tjera që fëmijëve u nevojiten për të shkuar në shkollë”, u shpreh ai në emisionin “Mesditë” në Tëvë1.
Kryetari i Drenasit u bëri apel qytetarëve që kanë pësuar dëme nga vërshimet të paraqiten në komunë për të aplikuar te komisionet përkatëse, në mënyrë që të bëhet vlerësimi i dëmeve.
Sipas tij, dëmet janë të mëdha dhe kanë prekur ekonomitë familjare, bizneset, bujqësinë si dhe infrastrukturën publike.
Lladrovci theksoi se dëmet më të mëdha infrastrukturore janë shkaktuar te urat, duke e cilësuar situatën si një nga vërshimet më të rënda të mbajtura mend në këtë komunë.
Ai shtoi se familjet e prekura po hasin vështirësi në pastrimin dhe riparimin e dëmeve për shkak të mungesës së ujit.
Në fund, kryetari i komunës apeloi ndaj ujësjellësit që të angazhohet më shumë për zgjidhjen e situatës, duke theksuar se qytetarët e Drenasit po përballen me vështirësi serioze dhe kanë nevojë urgjente për furnizim me ujë. /teve1.info/
