Është një nga lojtarët me përvojë të madhe në futbollin kosovar. Padyshim që eksperienca e Dreni Gashit, luajti rol në inkuadrimin e Feronikelit ‘74 në Superligë.
Gashi në një prononcim dhënë për Tëvë1 tha se rruga për deri në inkuadrim në Superligë ishte e gjatë. Sipas tij, edhe pse kishin pengesa gjatë rrugës vazhduan me ato forca që kishin në “supe” dhe u shpallën kampion në Grupin A të Ligës së Parë.
“Ishte një rrugë shumë e gjatë dhe e mundimshme, por që në fund u shpërblyem me titullin kampion. Të gjithë tani më e dijnë rrugën në të cilën kaloi Feronikeli. Në gjysmën e kampionatit kishim probleme me regjistrimin e lojtarëve të cilët u afruan në gjysmësezonin e dytë. Megjithatë, ne vazhduam pa u ndaluar me ata lojtarë të cilët ishim dhe në fund u shpërblyem me titullin kampion”, tha Gashi.
Anësori ndër tjera tha se klubi nga Drenasi po bën ç’mos që ti përshpejtoi punët për edicionin e ri në Superligë.
“Klubi momentalisht është duke bërë gjithçka që është e mundur për ti filluar punët dhe të mendojë për edicionin në Superligë”, shtoi tutje Gashi.
29-vjeçari është në përfundimin e kontratës me Feronikelin ‘74 dhe “vala” e skuadrave që kërkojnë shërbimet e tij është kogja i madh. Dren Gashi kërkohet nga klube të Kosovës, por edhe në Shqipëri. Mirëpo, Gashi thotë se përparësi ka ekipi i Feronikelit dhe me pas do të shqyrtoi ofertat tjera.
“Ofertat që kam vijnë edhe nga Kosova, po ashtu edhe nga Shqiperia, por njëherë ka përparësi Feronikeli. Nëse arrijmë të dakordohemi do të vazhdoi me Feronikelin, nëse jo do të shqyrtoi ofertat tjera”, përfundoi Gashi.
