Një person ka humbur jetën dhe pesë të tjerë kanë mbetur të lënduar si pasojë e një aksidenti trafiku që ka ndodhur mëngjesin e sotëm në magjistralen Pejë–Prishtinë, në fshatin Dollc.
Sipas njoftimit të Policisë së Kosovës, në aksident ishin të përfshira një veturë me targa vendore dhe një autobus.
Hetimet e para dyshojnë se deri te aksidenti ka ardhur pasi drejtuesi i veturës, i cili po lëvizte në drejtim të Prishtinës, nuk i është përshtatur shpejtësisë dhe kushteve të rrugës, duke humbur kontrollin mbi automjet. Si pasojë, ai ka kaluar në shiritin e kundërt dhe ka goditur autobusin në pjesën ballore.
Nga përplasja, shoferi i veturës ka ndërruar jetë në vendin e ngjarjes. Vdekjen e tij e ka konstatuar ekipi mjekësor. Ndërkohë, pesë persona tjerë kanë pësuar lëndime trupore dhe janë dërguar në Spitalin Rajonal të Pejës për trajtim mjekësor.
Me urdhër të prokurorit të shtetit, i cili ka qenë në vendin e ngjarjes, trupi i pajetë i viktimës është dërguar në Institutin e Mjekësisë Ligjore në Prishtinë për obduksion.
Policia e Kosovës ka njoftuar se rasti është duke u hetuar për të sqaruar të gjitha rrethanat.
Një i vdekur dhe pesë të lënduar në një aksident komunikacioni në Klinë
