Drejtori i Përgjithshëm i Policisë së Kosovës, Gazmend Hoxha, pas zhvillimeve të fundit në veri të vendit, ka vizituar fshatin Banjskë.
Përmes një komunikate, bahet e ditur se Hoxha ka qenë i interesuar rreth ofrimit të sigurisë ndaj qytetarëve, teksa ka siguruar që Policia e Kosovës do të vazhdoj tu ofrojë ndihmë të gjithëve sipas nevojave dhe kërkesave të tyre.
“Pas zhvillimeve të fundit të ndodhura në fshatin Banjskë në veri të vendit dhe veprimeve të koordinuara policore në menaxhimin e sigurisë dhe vendosjen e rendit dhe ligjit, Drejtori i Përgjithshëm i Policisë së Kosovës Kolonel Gazmend HOXHA, i shoqëruar nga menaxhmenti i lartë i PK-së, vizituan vendngjarjen në fshatin Banjskë. Njëkohësisht drejtori HOXHA, u interesua rreth ofrimit të sigurisë ndaj qytetarëve nga njësitet policore dhe siguroi që PK-ja do të vazhdojë tu ofrojë ndihmë qytetarëve sipas nevojave dhe kërkesave të tyre. Drejtori i PK-së, shprehu mirënjohje ndaj zyrtarëve policorë dhe i falënderoi ata për punën e tyre të suksesshme dhe profesionale në menaxhimin e situatës së sigurisë dhe parandalimin e aktiviteteve kriminale dhe terroriste”, thuhet në komunikatën e Policisë.
Gjatë kësaj vizite, Hoxha u shoqërua nga Zëvendës Komandanti i KFOR-it, teksa takuan këshilltarin e EULEX-it për drejtorinë rajonale të Mitrovicës veriore, me të cilët kanë diskutuar rreth situatës së sigurisë.
“Gjatë vizitës në disa lokacione në fshatin Banjskë ata takuan dhe inkurajuan zyrtarët e institucioneve të sigurisë të cilët me përkushtim dhe profesionalizëm po kryejnë detyrat në mënyrë aktive në teren, me qëllim të krijimit të një sigurie më të madhe për të gjithë qytetarët pa dallim”, thuhet tutje në komunikatë.