Drejtori i përgjithshëm i BBC-së, Tim Davie, dhe kreu i BBC News, Deborah Turness, kanë dhënë dorëheqjen pas akuzave për paragjykim “serioz dhe sistematik” në mbulimin e çështjeve të ndryshme, përfshirë Donald Trumpin, Gazën dhe të drejtat e transgjinorëve.
Akuzat u ngritën nga një ish-këshilltar i korporatës, duke shkaktuar tronditje brenda një prej institucioneve më të rëndësishme mediatike në botë.
Në një deklaratë, Davie tha se largimi i tij ishte “tërësisht vendimi im”, ndërsa kjo vjen në një moment kur BBC po përgatitet të kërkojë falje për mënyrën se si redaktoi një fjalim të presidentit amerikan, Donald Trump.
Deborah Turness, drejtuesja e BBC News, po ashtu ka dhënë dorëheqjen. Burime nga brenda departamentit të lajmeve përshkruan atmosferën pas lajmit si një gjendje zhgënjimi të thellë, raporton Guardian.
“Ndihet si një grusht shteti,” tha njëri prej tyre. “Ky është rezultat i një fushate nga armiqtë politikë të BBC-së.”
Dorëheqjet vijnë në një moment kritik për korporatën, e cila po hyn në bisedime të rëndësishme me qeverinë britanike mbi të ardhmen dhe financimin e saj.
Kërkimi për të mbushur dy nga pozicionet më të mëdha në median britanike tashmë ka filluar.
Ndërkohë, kryetari i BBC-së, Samir Shah, pritet gjithashtu të kërkojë falje për mënyrën se si u redaktua fjalimi i Donald Trump në programin Panorama.
Sipas kritikave të bëra nga ish-këshilltari, Prescott, redaktimi i fjalimit në edicionin e Panorama bashkoi fragmente nga një fjalim që Trump mbajti më 6 janar 2021. Versioni i transmetuar sugjeronte se ai i kishte thënë turmës: “Do të ecim drejt Kapitolit dhe unë do të jem atje me ju, dhe do të luftojmë. Do të luftojmë si ferr.”
Megjithatë, fjalët e Trump u morën nga pjesë të ndryshme të fjalimit të tij, me një diferencë prej pothuajse një ore.
