Derbi i madh Prishtina – Drita mbyllet pa fitues, me dramë e spektakël në “Fadil Vokrri”, dhe me gjashtë gola, në ndeshjen e jashtëzakonshme të shtunën mbrëma.
Kur po pritej vërshëllima e fundit dhe fitorja e parë e Prishtinës ndaj Dritës pas dy vjetëve, kapiteni i gjilanasve Rron Broja shënoj në minutën e pestë të kohës shtesë për rezultatin 3:3.
Dueli në kryeqytet nisi mirë për bardhekaltrit vendës që pjesën e parë e mbyllën 2:0 me golat e Leutrim Kryeziut (23’) dhe Diar Halilit (35’).
Sfida u hap në pjesën e dytë kur Besnik Krasniqi shënoi nga penalltia për 2:1, para se Drilon Islami të rikthente epërsinë e dy golave te Prishtina në minutën e 75-të.
Albert Dabiqaj mbajti Dritën në lojë me golin për 3:2, ndërsa Broja i siguroi një pikë ekipit të tij me golin në çastet e fundit.
Drita lidere ka 44 pikë, Prishtina e katërta në tabelë tani ka 29 pikë.
