Banka Qendrore e Kosovës ka njoftuar se zëvendësguvernatorja e përkohshme Nora Latifi – Jashari ka dhënë dorëheqje.
Në njoftim thuhet se, kjo ka ndodhur për shkak të angazhimeve profesionale të Latifi – Jasharit, raporton teve1.info
“Në takimin e mbajtur më 29 mars 2023, të Bordit të Bankës Qendrore të Kosovës, në bazë të Ligjit për BQK, në një nga pozitat e përkohshme ekzekutive është vendosur edhe anëtarja e Bordit, Nora Latifi – Jashari, si Zëvendësguvernatore e Përkohshme. Për shkak të angazhimeve profesionale e kontraktuale që Latifi – Jashari ka pasur jashtë BQK-së edhe para këtij vendimi, ka kërkuar që të lirojë pozitën e përkohshme në BQK nga data 15 maj 2023”, thuhet në njoftimin e BQK-së.
Sipas njoftimit ky veprim nuk e cenon në asnjë mënyrë vazhdimësinë e përmbushjes së objektivave të BQK-së.
“Bordi Ekzekutiv mbetet funksional deri në plotësimin e pozitave të rregullta të anëtarëve të Bordit Ekzekutiv sipas Ligjit të BQK-së. Për më shumë Latifi Jashari vazhdon kryerjen e detyrave si anëtare joekzekutive e Bordit të BQK-së”, thuhet në njoftim.
