Boksierja kosovare, Donjeta Sadiku synon të shpallet kampione e botës, ka insistuar të martën Latif Demolli, sekretari i përgjithshëm i Federatës së Boksit të Kosovës.
Prej të enjtes deri më 14 shtator, në qytetin e Liverpoolit në Angli, do të mbahet Botërori i boksit, në të cilin do të marrë pjesë edhe Kosova.
Në këtë ngjarje të madhe të boksit, Kosova do të paraqitet me katër garues, ku krahas Donjeta Sadikut do të boksojnë edhe Shpejtim Bajoku, Bashkim Bajoku e Loris Idrizi.
Demolli ka insistuar se federata i ka kushtuar rëndësi të veçantë këtij botërori, pasi ekipi është maksimalisht i përgatitur për rezultate të mira.
Megjithatë, federata suksesin e madh, medaljen e artë në këtë ngjarje e pret nga boksierja Sadiku.
Sadiku ishte dërguar në kampin ndërkombëtar në Sheffield të Anglisë për t’u bërë gati, ndërsa vëllezërit Bajoku e Idrizi janë përgatitur në Sofje të Bullgarisë.
“Donjeta ka qenë në formë të mirë, ka pasur një ftohje për tre apo katër ditë por është kaluar ajo dhe është në formën e duhur dhe presim që medaljen e bronztë që ajo e ka nga Kampionati Botëror në Turqi ta shndërrojë në Liverpool në medalje të artë dhe besoj dhe shpresoj që Donjeta do të jetë kampione e botës. Kurse, nga djemtë presim që të marrim minimumin një medalje, pa marrë parasysh a është e artë, e argjendtë apo e bronztë”, ka thënë Demolli për “Kosova Press”.
Nuk është vetëm Sadiku prej të cilës në Federatën e boksit presin medalje në Botërorin që mbahet në Liverpool të Anglisë, pasi shpresat janë edhe te Shpejtim e Bashkim Bajoku.
