Donjeta Sadiku është e para që do të filloj garat në Lojërat Olimpike “Parisi 2024” nga të gjithë pjesëmarrësit e Kosovës në këtë ngjarje të madhe sportive.
Sadiku në meçin e parë të turneut olimpik të boksit do të përballet me kundërshtaren nga Tajlanda, Thananaya Somnuek.
Ky meç i takon kategorisë deri 60 kilogramë dhe zhvillohet në mbrëmje, diku rreth orës 21:00.
Për Sadikun, kjo është hera e dytë që do të paraqitet në Olimpiadë kurse e para me normë olimpike.
Ajo mungoi të premten mbrëma në ceremoninë hapëse të Lojërave Olimpike, në mënyrë që të fokusohet tërësisht për meçin e parë.
Sadiku e njeh boksieren nga Tajlanda, e cila e kishte mposhtur në shkurt të këtij viti në çerekfinale të turneut “Strangja” në Bullgari.
Në rast se e kalon këtë kundërshtare, Sadiku më pas do të ballafaqohej me boksieren nga Kolumbia, Angie Paola Valdes Pana, ndërsa në çerekfinalen e mundshme, do të boksonte ndaj irlandezes Kellie Harrington.
