Shëtitja në qytet pas iftarit doli të jetë fatale për 19 vjeçarin Ardit Zymeri nga fshati Shashtricë e Komunës së Vushtrrisë.
Zymberi, mbeti i vrarë në rrugën “Galip Badivuku” mbrëmjen e së dielës.
I dyshuari B.D., po ashtu 19 vjeçar u kap nga autoritetet pak pas këtij akti.
Familja e të ndjerit, në fshatin Shashtricë ka hapur të pamet për kryeshëndoshë.
Axha i tij, Nysret Zymeri buzë-dridhur rrëfen momentin se si e kanë pranuar lajmin.
Ai thotë nuk kanë qenë në dijeni për ndonjë problem të Arditit.
Ndërsa, pasditen e së hënës, i dyshuari B.D ka pranuar fajësinë për vrasjen e Zymberit.
Detaje për vrasjen dhanë edhe nga Policia e Kosovës.
“Nga hetimet e kryera në vendin e ngjarjes dhe ekzaminimet e kryera, hetuesit policor si prova materiale kanë gjetur dhe sekuestruar tri (3)gëzhoja. Hetuesit policorë kanë identifikuar dhe arrestuar të dyshuarin B. D., 19 vjeçar nga i cili është konfiskuar një armë pistoletë që dyshohet të jetë përdorur nga i dyshuari në kryerjen e veprës penale. Në shtëpinë e të dyshuarit është realizuar bastisje ku është gjetur dhe konfiskuar edhe një armë e gjatë me pesë (5) fishek”, është thënë nga Policia.
Motivet e këtij krimi ende nuk dihen.
