Dogana e Kosovës ka identifikuar një rast të deklarimit të pasaktë të mallrave në Zyrën e Brendshme Doganore në Prishtinë, me qëllim të shmangies së pagesës së Tatimit mbi Vlerën e Shtuar (TVSH).
Sipas njoftimit zyrtar, gjatë kontrollit dokumentar dhe ekzaminimit fizik të një dërgese mallrash, janë konstatuar mospërputhje ndërmjet përshkrimit të deklaruar dhe gjendjes faktike të mallit, i cili ishte deklaruar si lëndë e parë për prodhim.
Gjatë ekzaminimit të detajuar, që ka përfshirë verifikimin e origjinës, sasisë, formës së paraqitjes dhe karakteristikave të tjera, është konstatuar se mallrat nuk përbëjnë lëndë të parë, por janë produkte farmaceutike të gatshme, të paketuara për shitje me pakicë.
“Me këtë veprim, është tentuar shmangia e pagesës së TVSH-së, si dhe nuk është paraqitur dokumentacioni shtesë përkatës, përfshirë certifikatën për import të produkteve farmaceutike të gatshme”, thuhet në njoftim.
Vlera e përgjithshme e mallrave të sekuestruara vlerësohet në rreth 49 mijë euro.
Rasti është cilësuar si kundërvajtje doganore, në përputhje me legjislacionin në fuqi, për shkak të deklarimit të pasaktë të të dhënave doganore me qëllim shmangien e detyrimeve fiskale.
“Mbetemi të përkushtuar në ruajtjen e funksionit rregullator dhe fiskal të shtetit, në mbrojtjen e shëndetit publik dhe në parandalimin e keqpërdorimeve gjatë importit të produkteve farmaceutike”, theksohet në njoftim./teve1.info/
